LAOAG CITY – Naapektaran ti presio dagiti magatang iti baro nga oil price hike gapu iti gastos iti transportasion, produksion ken agrikultura a nakadependar iti petrolyo tapno maibiahe dagiti produkto manipud kadagiti kataltalunan ken pabrika agingga kadagiti paggatangan.
Gapu iti daytoy, ngimmato dagiti sumagmamano a magatang kas kadagiti ikan ken natnateng.
Mainaig iti daytoy, adu dagiti aggatang ti agrekreklamo pakairamanan payen dagiti agnegnegosio gaputa bumasbassiten ti mapaspastrekandan gapu it agtultuloy a panagngina dagiti magatang ken kasta payen ti panagngato dagiti produkto ti petrolyo.
Kabayatanna, manamnama nga umabot agingga iti bulan ti Disiembre ti panagngato ti presio dagiti produkto ti petrolyo.
Nupay kasta, impasigurado ti Department of Energy a saan nga umabot iti P20 iti kada litro a mainayun a presio no kasta nga aggaraw ti presio dagiti produkto ti petrolyo.
