LAOAG CITY – Bimmaba ti presio iti panaggatang dagiti traders ti irik ditoy probinsia.
Daytoy ti inpakaammo ni Mr. Marcelino Lacambra, maysa a trader ti irik iti ili ti San Nicolas.
Segun kenkuana, adda ti tallo a klase nga ikonkonsiderarda iti panaggatang ti irik manipud kadagiti mannalon.
Inbatadna a ti Class A ket isu ti kapintasan a klase ti irik a gatangenda ti 21.50 a pisos iti kada kilo, Class B ket 20 a pisos ken Class C ket dagiti nangisit wenno adu ti ippesna rason a saanda a gatangen.
Inlawlawagna a no idasig ti agdama a presio ti irik ket bimmaba daytoy gapu iti nagbalin nga epekto ti bagyo iti kallabes no sadinno nga adu dagiti pagay a nauper ti danom a rason iti panagngisit dagiti irik.
Malaksid iti daytoy, inpettengna a ti agtultuloy nga importasion ti maysa pay a rason iti nababa a presio ti irik.
Kunana nga awan ti kinapudnona a dagiti traders ti mangkonkontrol ti nababa a presio ti irik gapu ta ibasbasarda laeng ti panaggatangda ti presio dagiti pangibagsakanda idiay Bulacan.
Inpalgakna nga arig saanda payen maabrot ti pagpuunanda gapu ta dakkel ti magastoda iti panangibiahe dagiti irik.
Innayonna a karaman ditoy ti 26 a ribu a pisos para iti krudo, innem a ribu a pisos para iti labor, uppat a ribu a pisos para iti entry fee ken 450 a pisos para iti panangikilo.
Kabayatanna, naammoan a no adda ti makita dagiti pagi-trade-danda a reject ket sabalinto manen a pukawda no sadinno a ti laeng mabalinda a pagabrutan no dadduma ket iti backload dagitoy.
