LAOAG CITY – Apagapaman a bimmaba ti presio ti bagas iti umuna a kagudua a paset ti Hunio, 2024, basar iti monitoring ti Department of Agriculture Bantay Presyo.
Basar iti datos nga inruar ti ahensia, nakitaan ti panagbaba ti presio ti imported premium rice manipod iti dati a P52.00 iti kada kilo idi maudi a lawas ti Mayo a nagbalin a P50 iti kada kilo iti katengngaan ti Hunio.
Pakairamanan ti imported regular milled rice ket bimmaba met ti piso manaipod iti dati a P49.00 iti kada kilo.
Nakitaan pay ti panagbaba iti presio ti local premium rice manipod iti dati a P52 iti kada kilo a nagbalin a P50 iti kada kilo.
Ti tallo a nadakamat a klase ti bagas laeng ti nakitaan ti panaggaraw ti presio iti napalabas a dua a lawas.
Para iti imported nga special rice, nagtalinaed ti presio daytoy iti P57 iti kada kilo nga isu ti presio iti maudi a paset ti Mayo, 2024.
Nagtalinaed iti P52.00 iti kada kilo ti presio ti imported a well-milled rice.
Iti baet daytoy, ti lokal nga special rice ket dumanon iti P56 iti kada kilo, P48 iti kada kilo para iti well-milled ken P45 iti kada kilo para iti regular milled.
