LAOAG CITY – Manamnama ti umdas a suplay ken panagbaba ti presio ti bagas ditoy pagilian inton Oktubre.
Daytoy ti inrakurak ni Department of Agriculture (DA) Assistant Secretary Arnel de Mesa iti press briefing iti Malakanyang.
Segun ken ni De Mesa, kas ti inkari ni Presidente Ferdinand Marcos Jr., mangrugin a bumaba ti presio ti bagas gapu iti manamnama a panagaapit kadagiti pagay ken panagsangpet ti imported a bagas ita a tawen.
Mangnamnama ti Department of Agriculture a makaapitda ti 20 a milyon a metriko tonelada ita a tawen.
Inlawlawag ti opisial a ti manamnama nga 400 agingga 600 a metriko tonelada a pannakalugi iti kada tawen ket adda pay laeng iti uneg ti limitasion kas ti epekto kadagiti naglabas a bagyo no sadinno a mapattapatta a 420 a ribu a metriko tonelada ti nasayang.
Gapu iti daytoy, manamnama nga inton Oktubre agingga inton Enero ket maaddaan ti dakkel a panagbalbaliw iti presio ti bagas.
