LAOAG CITY – Kinumpirmaran ni National Food Authority (NFA) Administrator Larry Lacson nga agtalinaed ti balor a P30 iti kada kilo ti buying price para iti irik malaksid laengen no daytoy ket balbaliwan ti National Food Authority Council.
Daytoy ket tapno masigurado a ma-maximize dagiti lokal a mannalon ti birokda.
Maipalagip nga iti katengngaan ti Abril ita a tawen, inpangato ti National Food Authority Council ti buying price ti irik iti P17 agingga iti P30 iti kada kilo tapno matulungan ti ahensia a maka-compete kadagiti pribado a traders.
Naammoan a nagturong idiay Davao Oriental ti National Food Authority official kaduana dagiti sumagmamano a miembro ti konseho tapno mangisayangkat ti panagsasarita pakairamanan dagiti mannalon ken empleado ti National Food Authority.
Iti nasao a panagsasarita, inpadanon dagiti mannalon ti nangato nga agricutural productivity ken kinapateg ti panagngato ti income wenno birok gapu iti suporta ti gobierno kas kadagiti subsidiya para iti makinaria ken nababbaba a labor costs gapu iti mekanisasion.
Nangisayangkat met ti inspeksion ti National Food Authority officials kadagiti pasilidad ken imbentario ti bagas.
