LAOAG CITY – Inpakaammo ni Ms. Irene Pascual, ti Egg Vendor iti Laoag City Public Market and Commercial Complex nga awan ti panaggaraw ti presio dagiti ilaklakoda nga itlog.
Daytoy ket iti baet nga adda ti panagbassit ti itlog kas maibasar iti Philippine Egg Board Association.
Segun ken ni Pascual, nupay man adda ti panagbassit ti kadakkel dagiti itlog nga ilaklakoda ket nagtalinaed latta ti presio dagitoy.
Inbatadna nga umdas ti suplay ti itlog kadakuada gapu ta sakto laeng dagiti gumatgatang kadakuada.
Inlawlawagna nga adu dagiti mapmapan gumatgatang kadakuada gapu ta kasapulanda met ti itlog para iti pammigat dagiti annakda ken alisto laeng daytoy a lutuen.
Kunana nga awan met pay ti planoda nga ipangato ti presio kadagiti ilaklakoda nga itlog ngem nakadepende daytoy kadagiti sumarsaruno nga aldaw.
Innayonna nga iti agdama, mailaklako ti small size ti itlog iti 180 a pisos iti kada tray idinto a ti large size ken 280 a pisos iti kada tray idinto a siam a pisos iti tunggal pedaso ti itlog.
Immuna iti daytoy, kinuna ti Presidente ti Egg Board a ni Francis Uyehura a ti nakaro a pudot ket nagresulta iti saan nga umdas a pannangan dagiti manok a mangitunda ti manmano laeng ken basbassit nga itlog.
