LAOAG CITY – Ad-adda pay a ngimmato ti presio ti kamatis kadagiti tiendaan basar iti monitoring ti Department of Agriculture.
Iti kaudian nga update ti ahensia, dumanonen iti P360 iti kada kilo ti presio ti kamatis nangruna kadagiti napipintas ti kalidadna.
Kayatna a saoen, ti maysa a kilo ti kamatis ket nanginngina pay iti maysa a kilo ti manok a dumanon laeng iti P240 iti kada kilo. Daytoy ket arig katukaden ti kada kilo a presio ti pork shoulder nga agdama nga adda iti P390 iti kada kilo.
Basar iti Department of Agriculture, dagiti medium-sized a kamatis ket dumanon laeng iti P20.00 iti kada pedaso wenno nasursurok pay.
Immunan nga inrakurak ti ahensia a dagiti nagsasaruno a bagyo a dimmuprak ditoy Pilipinas ti kangrunaan a makaigapu ti nalabes a pannakaapektar iti suplay ken presio dagiti agricultural products kangrunaanna kadagiti natnateng.
Malaksid iti kamatis, banbantayan pay ti Department of Agriculture ti alisto a panagngato ti presio ti siling labuyo kadagiti merkado.
Basar iti update ti ahensia, dumanon iti P1,000 iti kada kilo ti presio ti siling labuyo manipud iti dati a P900 iti kada kilo, sumagmamano nga aldawen ti napalabas.
