Ngimmato ti retail price ti karne ti manok iti P10 kada kilo ken mailako iti P230 kada kilo manipud iti P220 kada kilo, segun iti Department of Agriculture.
Maibasar iti kaudian a panangmonitor ti ahensia kadagiti merkado iti Metro Manila, mabalin a magatang ti karne ti manok iti nagbaetan ti P170 agingga iti P230 kada kilo.
Mainaig iti daytoy, insennaay ti United Broiler Raisers Association (UBRA) ken ti Philippine Egg Board ti di panagpapada ti presio ti farmgate ken ti retail price ti manok.
Maibasar iti panangmonitor ti United Broilers Raisers Association iti farmgate price ti manok iti Luzon, ket P119 kada kilo iti Tarlac, P125 kada kilo iti Batangas, Pampanga ken Cavite ken P121 kada kilo iti Bulacan.
Segun iti chairman ti United Broilers Raisers Association, a ni Gregorio San Diego, nagdesisyonan dagiti agtartaraken iti broiler a kissayan ti produksionda gapu ta nalugi da iti napalabas a 8 a bulan.
Kabayatanna, kinuna ni San Diego a ti desision ti Departament of Agriculture a mangiraman kadagiti itlog kadagiti relief pack ti DSWD ket maysa a win-win solution iti baet ti isyu nga oversupply ken agtultuloy a panagbaba ti presio ti farmgate.
