LAOAG CITY – Bimmaba ti 70 a sentimo iti kilowatt per hour ti kuryente ditoy Ilocos Norte iti baet a ngimmato ti nakonsumo a kuryente dagiti member consumers.
Daytoy ti naragsak nga inpakaammo ni Mr. Cipriano “Perry” Martinez, ti Acting General Manager iti Ilocos Norte Electric Cooperative.
Segun kenkuana, nakakontratada iti Aboitiz Group nga agdama a supplier ti nasao a kooperatiba nga addaan ti 52 megawatts.
Inbatadna a ti naglabas nga aldaw ket dumanon iti nasurok 60 megawatts nangruna iti rabii a pinagtuturog dagiti tattao ket isu ti naobserbaranda a panagngato ti makonkonsumo a kuryente.
Gapu iti daytoy, inpetteng ni Martinez nga iti kada aldaw ket adda ti tallo agingga uppat a transformer a bumtak a rason a saanen a makaturturog pay gapu ta masapol a dagus a marespondean dagitoy.
Kunana a no nangato ti makonsumo a kuryente a nangatngato ngem iti nakailanad iti kontrata ket ngumina ti kuryente.
Nupay kasta, inlawlawagna a napagtalinaedda ti nababa a gatad ti kada kilowatt per hour gapu iti Anti-bill Shock Lending Program iti Landbank.
Babaen iti nasao a programa ket immutangda ti nasurok kumurang 100 milyon a pisos tapno saan a maipabaklay kadagiti member consumers ti kasapulan a mabayadan iti supplier.
Inlawlawagna nga iti kada bulan ket makakonsumo ti probinsia ti 29 megawatts ngem iti napalabas a dua a bulan ket ngimmato ti 7 million megawatts wenno 20% increase.
Mamati daytoy a gapu iti agdama a situasion ket agtultuloy pay ti dua a bulan nga isu metten ti pakausaran ti inutangda.
Mainaig iti daytoy, inpakaammona nga idi bulan ti Abril ket nakausardan ti 30 milyon idinto nga iti daytoy a bulan ti Mayo ket 43 milyon.
Inpanamnama ni Martinez a kitaento ti Ilocos Norte Electric Cooperative no mano a porsiento ti ibaklay ti kooperatiba tapno saan a dakkel ti mainayon a kuryente ditoy probinsia.
Iti agdama, 9.52 ti presio ti kuryente ditoy probinsia iti bulan ti Mayo a nababbaba ngem .70 a sentimo iti 10.48 iti kilowatt per hour idi bulan ti Abril.
