LAOAG CITY – Inpasigurado ti Malakanyang iti publiko nga agtalinaed nga awan ti panaggaraw ti presyo dagiti kangrunaan a magatgatang ken prime commodities agingga intono Mayo 10 ita a tawen kas paset ti addang a protehiran dagiti , konsyumer manipod iti epekto ti agtultuloy a panagngato ti presyo ti langis iti world market.
Segun ken ni Department of Economy, Planning, and Development (DEPDev) Undersecretary Joseph Capuno, ti commitment iti price stability nga indanun ti Department of Trade and Industry (DTI) ket paset ti agkakakonektar nga interbensyon iti babaen ti Unified Package for Livelihoods, Industry, Food, and Transport (UPLIFT) program tapno malapdan ti panagngato ti inflation.
Innayon na a papapigsaen ti gobierno ti monitoring iti presyo ti taraon, agas ken dadduma pay a kangrunaan a kasapulan tapno maliklikan ti saan a nainkalintegan a panagngato ti presyo iti baet dagiti aberya iti supply chain iti lubong.
