LAOAG CITY – Inbatad ni Mrs. Norma Lagmay, Provincial Agriculturist ditoy probinsya a nabunungan aminen a munisipyo ti tarpaulin nga ayan ti presyo dagiti nagduduma a produkto kas ti nateng, karne, lames ken dadduma pay.
Reaksyon daytoy ni Lagmay kalpasan nga adda dagiti Talipapa a maipagarop a nangina unay ti presyo dagiti lako da.
Inlawlawag ni Lagmay a ti presyo dagiti nasao a produkto nga intuding ti gobierno probinsyal ita a panawen ti krisis gapu iti covid-19 ket inpasigurado na a saan a maatiwan dagiti mannalon, aglako ken aggatang.
Nagballaag ni Lagmay kadagiti aglaklako kadagiti Talipapa ken tiendaan a manglabsing iti naituding a presyo dagiti nasao a produkto a no maireport kadakuada ti ar-aramiden da ket mapan a dagus dagiti kameng ti pulisya ken NBI iti pwesto da, ken adda ti maipataw a multa kadagiti maseknan.
Innayon na a nawaya met dagiti tattao nga agreport kadakuada no adda dagiti aglako iti nangina unay a presyo iti nagduduma a produkto babaen iti panagtawag da laeng iti Hotline da a 770-12-13 ken 770-42-37, wenno mapan da a mismo iti opisina it provincial agriculturist.
