LAOAG CITY – Inrakurak ti maysa nga opisyal ti Department of Transportation (DOTr) a mabalin a bumaba ti presyo ti kada litro dagiti produkto a petrolyo no umado dagiti electric vehicle kadagiti kalsada iti pagilian.
Segun ken ni Department of Transportation Executive Assistant to the Secretary Joni Gesmundo, saan laeng nga environmental friendly dagiti electric-vehicles, mabalin pay daytoy nga agbalin a potensyal a solusyon iti nabayagen a problema dagiti motorista iti nangato a presyo ti gasolina.
Nupay kasta, inbatad ni Gesmundo a ti panangilungalong iti ad-ado nga electric-vehicle iti pagilian ket masapol a kontrolen, kangrunaan na ket adon dagiti tattao a naireport a naaksidente bayat a nakalugan dagitoy ti unregulated nga eletric-trike ken ekectric-bikes.
Immunan a naireport a ti pannakaipawil kadagiti tricycle, puscharts, pedicabs, kuligligs, e-bikes, e-trikes, ken light e-vehicles iti agarop 20 a national roads iti Metro Manila ket nagepekto idi Lunes, Abril 15 ita a tawen.
Iti baet daytoy, inbilin ni Presidente Ferdinand “Bongbong” Marcos Jr., a maikkan ti pawayway dagiti maseknan no sadinno a dagiti aglabsing ket saan paylaeng a maikkan ti ticket wenno mamulta.
