LAOAG CITY – Inbatad ti Department of Agriculture (DA) ti panagbaba ti presyo ti bagas a mailaklako iti babaen ti Rice-for-All program iti P42 kada kilo manipod iti P43.
Segun ken ni Agriculture Secretary Francisco Tiu Laurel Jr., ti panagbaba ti presyo ket gapu iti pannakaipababa ti taripa iti imported a bagas ken panagbaba ti presyo ti produkto iti intero a lubong.
Kuna ni Laurel a dakdakkel koma pay ti nagbabaan ti presyo no saan a gapu iti epekto ti panagbaba ti piso iti P58 kontra iti maysa nga US dollar.
Ti programa a Rice-for-All ket mabalin a gundawayan ti amin nga aggatang nga awan ti limitasyon na, saan a kas ti P29 a kada kilo ti bagas, a nailatang laeng para kadagiti marigrigat, nakakapuy a grupo kas kadagiti senior citizen, adda rangkap ti bagina, solo parent ken dagiti pamilya a nababa ti mapaspastrek na iti kada aldaw.
