LAOAG CITY – Inpakaammo ni Police Chief Master Sergeant Harold Nicolas, mangidadaulo iti Provincial Drug Enforcement Unit iti INPPO, nga adda ti panagngato ti presyo ti iligal a druga ditoy probinsya.
Kuna na a basar iti kaudian a workshop da iti Philippine Drug Enforcement Agency, ti street value ti maipagarup a shabu ket agdepende iti presyo na basar iti lugar kas ditoy siudad ti Laoag ken iti siudad ti Batac.
Segun kenni Nicolas, possible nga umabot iti 10 a ribo a pisos agingga iti 12 a ribo a pisos ti presyo iti maysa a gramo ti iligal a druga no mailako iti siudad.
Inbatad na a no mailako met iti maysa nga ili ket nalaklaka ti presyona ken agdepende kadagiti aglako no am-ammo da wenno saan.
Innayon ni Nicolas a ti presyo met ti mapagango a bulong ti marijuana ket umabot iti 200 a pisos iti maysa a tea bag.
Immunan a naiestablisar dagiti otoridad a ti pannakaiserrek dagiti iligal a druga ket usar iti waybill wenno padala.
