LAOAG CITY – Posible a maingato ti presyo ti itlog kadagiti merkado, kagiddan ti school year 2024 – 2025.
Segun ken ni Department of Agriculture Spokesperson Assistant Secretary Arnel de Mesa, ti panagngato ti presyo ti itlog iti kada aglukat ti baro nga school year ket masansan gapu ta demand ti itlog, ken agtultuloy daytoy agingga ‘ber’ months.
Basar iti monitoring tiDepartment of Agriculture -Bantay Presyo, umabot iti P5.50 agingga P9 ti kada piraso ti presyo ti medium-sized nga itlog idiay Metro Manila.
Kuna ni De Mesa, mabalin a ngumato ti presyo agingga 10 a porsiento agingga 20 a porsiento.
Mainaig iti daytoy, inbatad met ti Philippine Egg Board Association president Francis Uyehara a nangrugin idi napan a bulan ti Hunyo a ngimmato ti presyo ti itlog kadagiti merkado.
Ibilang ni Uyehara daytoy kas “third quarter syndrome” wenno panawen a naruay dagiti agsaksakit a manok no sadinno a kaadwan a matamtamaan iti sakit ket dagiti agit-itlog a monok.
Nupay kasta inpanamnama na a marikna ti nangato a presyo ti itlog agingga holiday season.
