LAOAG CITY – Kalikagom dagiti aglaklako ti karne ti baboy iti merkado publiko iti ili ti Solsona a maipangato ti presyo ti lako da.
Segun kenni Mr. Willie Calucag, manipud iti 195 a pisos a presyo iti kada kilo ti karne ti baboy ket kalikagom da a mapagbalin a 230 a pisos.
Inbatad na a kalikagom da kuma a maipangato ti paggatang da ti baboy ken maipangato ti presyo ti karne.
Inlawlawag na nga adda ti dumaydayo kadakuada a ti paggatang da iti live wieght ket 140 a pisos idinto nga isuda ket 120 a pisos.
Mainaig iti daytoy,
Inlawlawag ni Mayor Joseph de Lara iti ili ti Solsona a pinatgan na ti kiddaw dagiti meat vendors a mangipangato ti presyo ti kada kilo ti karne baboy ngem saan da nga ipada iti presyo dagiti dadduma nga ili.
Segun kenni De Lara, manipud iti 195 a pisos ket agbalin a 220 a pisos iti kada kilo ti karne ti baboy saan ket a ti kiddaw dagiti meat vendors nga umabot iti 230 a pisos.
Inbatad na a ti paggatang met ti live weight ket 130 a pisos iti kada kilo manipud iti 120 a pisos.
Kunana nga inpresentar na kadagiti meat vendors iti ili da ti nakalap dagiti sumagmamano a kameng ti DA kalpasan ti panagmonitor dagitoy iti presyo iti nagduduma nga ili.
Inbatad na a maysa pay kadagiti nagtutulagan da ket ti kondisyon a no umadon ton ti suplay ti baboy ket agsubli met laeng ti presyo ti karne ti baboy.
Kabayatanna, ti nasao a presyo ket epektibo met laeng ita nga aldaw.
