LAOAG CITY – Kinumpirmaran ni Mr. Ramel dela Cruz, presidente dagiti “meat vendors” iti Laoag City Commercial Complex a bimmaba ti presyo ti karne ti baboy.
Segun kenni dela Cruz, daytoy ket gapo iti kinarigat ti aglako ken ad-adda a ti gatangen dagiti tattao ket ti karne ti manok wenno baka.
Naamoan a manipud iti 230 a pisos iti kada kilo ti karne ti baboy ket nagbalinen a 220 a pisos, ken agdepende no ania a paset ti baboy ti gatangen.
Inbatad na a maysa kadagiti posible a rason ket ti panagamak ti publiko maipanggep iti African Swine Fever (ASF) uray awan ti kaso iti nasao a sakit ditoy ciudad ti Laoag ken iti probinsya.
Inlawlawag na a malaksid iti panagbaba ti presyo dagiti ilaklako na a karne ti baboy ket nakissayaan pay ti partyen na iti inaldaw.
Kunana a manipud iti pito a baboy ket tallo wenno uppat laengen ti parpartyen na iti kada aldaw idinto a no aldaw ti tienda ket uppat wenno lima laengen ti partyen na.
