LAOAG CITY – Inpakammo ni Mr. Noel Andres, information officer iti Ilocos Norte Electric Cooperative a limmaka ti presyo ti kuryente.
Kuna na nga umabot iti 8.57 a pisos iti kada kilowatt hour ti agdama a presyo ti kuryente idinto nga itay bulan ti Marso ket umabot iti 10.0081 a pisos iti kada kilowatt hour.
Inlawlawag ni Andres a ti pakadagupan a bayadan dagiti member consumer, agraman dagiti dadduma pay a buwis ket agdagup iti P9.56 idinto ti dati a presyo ket P11.17 iti total rate per kilowatt hour.
Segun kenni Andres, karaman pay a mabenepisyaran iti nalaka a presyo ti kuryente dagiti babassit nga establisimiyento ken dagiti dadakkel nga establisimiyento.
Inbunannag na a limmaka ti kuryente gapu ti panagangkat da ti agregated power supply, no sadino nga amin nga electric cooperative iti Rehiyon Uno manipud iti San Miguel Energy Corporation, Mini Hydro Power Plant ken ti Whole Sale Electricity Spot Market.
Inlawlawag ni Andres a no ad-ado a kuryente ti gatangen da iti nasao a korporasyon ket nalaklaka met ti presyo iti kada kilowatt hour.
Awan met ti epekto ti nangato a kunsumo ti kuryente ita a panawen ti kalgaw iti nalaka a presyo gapu ti napirmaan a katulagan iti nagbabaetan dagiti electric cooperative ken kadagiti tallo a kompanya.
Innayon ni Andres a saan met nga agkurang ti suplay ti kuryente ngem ketdi maibilang a naingpis a saan a kas iti napalabas a nadanun pay ti yellow level alert iti supply ti kuryente.
