LAOAG CITY – Inparipirip ti Department of Health ti panangipatungpal ti tallo a bulan a panag-freeze ti presio kadagiti nasurok 100 a kangrunaan nga agas kadagiti nagduduma a lugar iti Luzon ti naibilin kagiddan ti nakaro nga iduduprak ti Super Typhoon Carina a binuyugan pay ti abagat.
Inbatad ti Department of Health a ti price freeze ket maipakat kadagiti 148 a produkto ken agas pakairamanan kadagiti bitamina ken mineral ken dagiti mairesreseta nga agas kontra iti asthma ken hypertension gapu ta dagitoy ket maibilang a kangrunaan a kasapulan.
Ginutigot ti Department of Health ti publiko nga i-report dagiti establishimento nga agsalsalungasing iti price-freeze order ken overpricing kadagiti produktoda.
Iti babaen ti Price Act, naammoan a dagiti maipataw a pannusa iti price manipulation ket ti pannakaibalud ti lima agingga iti 15 a tawen nga adda ti multana manipud iti P5,000 agingga iti P2 a milyon.
Kabayatanna, ti asinoman a mapaneknekan a naglabsing iti price ceiling ket sumango iti pannakaibalud ti maysa a tawen agingga iti 10 a tawen ken multa manipud iti P5,000 agingga iti P1 a milyon.
