LAOAG CITY – Inbatad ni Mayor Albert Chua iti siudad ti Batac nga amin a 12 a baro a kaso ti covid-19 iti nasao a siudad ket agkakadwa iti trabaho.
Mainaig iti daytoy, kuna na a kalpasan a naamoan a positibo dagitoy iti virus ket dagusda a naiapan iti isolation pakairamanan dagiti nadeterminar a contact da.
Inbaga na a nasurok a 100 ti kadagupan ti primary contacts dagiti baro a kaso pakairamanan dagiti empleado ti City Health Office.
Inpakaamo ni Chua a dumalan iti swab testing dagiti primary contacts intuno bigat ken nu bilang adda ti agpositibo kadagitoy ket dagus met a maipadalan iti testing ti maibilang a secondary contact dagiti nagpositibo.
Immuna iti daytoy, inpakaamo ni Chua a ti nakapulapol dagiti baro a kaso ket ti APOR nga agpapaay kas government employee a nagturong iti Quezon City iti kallabes.
Inbunannag na nga idi naamoan a positibo daytoy kalpasan a a nakapulapol na ti maysa met laeng a nagpositibo idiay Quezon City ket naderminar ti 20 a primary contact na nga isu metten ti naggapoan dagiti 12 a baro a kaso kalpasan a positibo ti resulta ti swab test dagitoy.
