LAOAG CITY – Inlawlawag ni Barangay Chairman Rodolfo Tomas iti Barangay 9 ditoy ciudad ti Laoag a nalockdown ti maysa nga apartment iti lugar da gapo ta isu ti pammilin dagiti contact tracers manipud iti DILG.
Segun kenni Tomas, idi Mayo 6 ket adda ti nagpositibo iti covid-19 a rason ti panagbantay da iti apartment.
Malaksid iti daytoy, kuna ni Tomas nga idi pay Mayo 12 ket nagpositibo met ti kakwartoan ti ummunan a positibo iti covid-19.
Nupay kasta, inbatad ni Tomas nga awan ti executive order ni Mayor Michael Marcos Keon iti daytoy gapo ta maysa laeng a pasdek ti mailockdown.
Mainaig iti daytoy, inbatad na pay nga idi inbaga dagiti contact tracers a dumalan iti swab test dagiti agnanaed iti apartment ket nagkedked dagitoy rason a nailockdown daytoy.
Kabayatanna, kuna ni Dr. Joseph Adaya, mangidadaulo ti contact tracing team ditoy ciudad ti Laoag a no ti maysa nga indibidual ket nadeterminar a primary contact ket masapol a dumalan iti swab test.
