LAOAG CITY – Naikkaten iti pwesto ti principal ti Colonel Ruperto Abellon National High School iti munisipalidad ti Laua-an iti Antique a ni Venus Divina Nietes.
Ti nasao a principal ti nag-viral iti social media kalpasan a pinaikkat na iti mismo a seremonya ti toga a suot dagiti nagturpos a senior high school students.
Segun ken ni Palace Press Officer Claire Castro, ti pannakaikkat ti principal ket isu ti dagus a nagbalin nga addang ni Department of Education Sec. Sonny Angara kalpasan ti insidente kas panangtungpal iti pammilin ni Presidente Ferdinand Marcos Jr.
Inbatad ni Castro a nupay mabalin paylaeng nga agisuro ti nasao a principal iti sabali a pagadalan, dumalan daytoy iti behavior evaluation.
Iti nag-viral a video, mabuya iti panangiwaragawag ti principal iti stage a saan a rumbeng nga agsuot ti toga dagiti agturpos basar iti Department of Education guidelines a pagbalinen a simple ti seremonya.
Inmandar na kadagiti graduating students a saan nga ag-toga no umuli da iti entablado, a kinontra ti sumagmamano nga estudyante ken dagiti nagannak.
Nagtungpal ti sumagmamano nga agad-adal ngem nangngeg ti panagbugkaw dagiti nangkontra iti pammalin ti principal.
