LAOAG CITY – Naglikudan ti maysa a dati a Principal ti Central Elementary School iti alegasyon a tinagbat na ti aso iti mismo a sango ti pagtaengan da iti Brgy. 48 B ditoy ciudad ti Laoag.
Segun kenni Mr. Primo Domingo, nakigtot laengen idi nadamag na a nakaiggem daytoy iti badang ken tinagbat na iti aso.
Inbatad na nga awan ti rason a patayenna iti aso ti kaanakan na nga apaglabes ti uken nga agserserbi a gwardya iti pagtaengan da.
Naamoan a daytoy iti maikatlo nga aso da a napatay.
Patien ni Domingo a karruba da iti nangpapatay ti nadakamat nga aso agsipod ta adda iti napan nagreklamo itay kallabes a nabangsit iti pagtaraknan ti baboy iti asideg ti tagikua na nga apartment.
