LAOAG CITY – Naiget a naglikudan ti principal iti Bacarra Central Elementary School a ni Mrs. Leonora Aguada dagiti alegasyon kenkuana dagiti agina a ni Mrs. Rosalie Alogongan ken ti grade 4 pupil nga anak na a residente met laeng iti ili ti Bacarra.
Daytoy ket namonganay iti maipagarop a panagibelleng ti maysa a janitress kadagiti basura iti pagdaldalusan ni Mrs. Alogongan a rumrumuar a nakita a mismo ti anak na.
Iti panagsasarita dagiti maseknan iti opisina ti principal ket nagbalin a nabara gapo ta maipagarop a pinagsawsaw-an ti principal ti anak na no sadinno ket intudtudo na ken binagaan na nga ulbod daytoy.
Inbatad na a mabuteng ti anak na a sumrek iti pagadalan gapo ta rumrumuar a no makita ti ubing ti principal ket dumakkel ti mata na ken napakigtotan iti mapaipagarop a panangitudtudo ti principal.
Inpetteng pay ni Alogongan nga idi sumungbat isuna ket kellaat lattan a nagibarsak ti principal ti flower vase ken nangato ti boses na kageddan ti panagruwar na ket dinakamat na a mapull-out dagiti agina iti pagadalan.
Mainaig iti daytoy, inpetteng ni Mrs. Aguada a paspasig nga inuulbud amin dagiti inbagbaga ni Alogongan isut gapuna binallaagan na daytoy nga isardeng nan ti agiwaras kadagiti saan nga usto a pasamak.
Nagpangta pay ti principal nga amangan a no ni Alogongan ti mabaltikan ket sumango daytoy ti oral
Slander ken moral damage.
Inpalgak na a saan koma a rumbeng nga usaren ni Mrs. Alogongan ti anak na tapno maala na ti simpatiya dagiti tattao.
Ibilang pay ti principal a mortal sin para kenkuana ti mangirurumen kadagiti ubbing rason a saan a pudno ti alegasyon ni Alogongan a pinagsasawan ken nagibarsak pay ti flower vase a kitkitaen ti anak na.
Innayon na a no maipapan met ti naibaga ni Alogongan nga inmandar na ti pannakaikkat dagiti agina iti imatmatunan na a pagadalan, inpasigurado na a saanna a maaramid ti mangpaikkat ti maysa nga agad-adal.
Inpaganetget pay ni Aguada nga awan ti karbengan na a mangpasakit kadagiti ubbing kangrunaan na dagiti agad-adal iti nasao a pagadalan.
Kabayatanna, inbatad met da Mr. Sadiri Yanos ken ni Miss Ely Anne Miguel a saan a pudno a nagibarsak ti flower vase ti principal da ken saanna nga inung-ungtan ti ubing.
Inrakurak pay da Yanos ken Miguel a ni laeng Mrs. Alogongan ti inbaga ti principal a mapull-out iti pagadalan ken saan a mairaman ti anak na nga ages-eskwela iti nasao a pagadalan.
Inistorya pay ni Miss Miguel nga idi naibaga kenkuana ti maipagarop a panagibelleng ti janitress kadagiti basura iti pagdaldalusan ni Alogongan ket pinagsango na a dagus dagiti maseknan.
Kuna na a ti nadlaw na ket agbaliw-baliw ti ibagbaga ti ubing ken uray idi napan na kinasarita ti ubing nga inbaga na a kadwa na a nakakita a nagibelleng ti janitress ti basura ket insungbat na nga awan ti ammo na iti nasao a pasamak.
