LAOAG CITY – Inbatad ni Mr. Prospero Corpuz, Principal iti Cabeza Elementary School ditoy ciudad ti Laoag a saan da nga ammo ti ayan ni Mrs. Mae Simon, ti mangisursuro nga agarop makatawenen a nakabakasyon.
Inbatad na nga adon dagiti komunikasyon nga inpadanun da ken ni Simon babaen iti kabsat na a maysa met laeng a mangisursuro ngem agpapan ita ket awan pay ti sungbat na.
Inlawlawag na nga immuna a nag-sick leave ni Simon kalpasan na ket nag-maternity leave ngem saan pay a nagsubli iti trabaho na agpapan ita.
Kuna ni Corpuz nga inbalakad da payen ti panangisumitir ni Simon ti resignation na no saannan a kayat ti agsubli a mangisuro ngem awan pay ti insumitir na.
Innayon na nga awan ti ammo da a pangkontakan ken ni Simon gapu ta uray dagiti papagayam na iti nasao a pagadalan ket inblock na ida iti facebook.
Kabayatanna, inpasingked ni Corpuz a saan a maapektaran dagiti estudyante a napanawan ni Simon gapu ta nabingay da iti dua section ken naitipon da kadagiti dadduma a section.
Segun pay kenkuana, saan a pudno ti maibagbaga a tunggal umakar ti pagklasian dagiti ubbing ket pagkaten da ti tugawda.
