LAOAG CITY – Inlawlawag ni Dr. Orlando Pascua, ti Principal iti San Nicolas Elementary School iti ili ti San Nicolas ti inparuk-at na a direktiba mainaig iti pannakaipawil a sumrek dagiti nagannak iti pagadalan.
Inbatad na nga ado unayen dagiti nagannak nga agbanbantay iti mismo a sango ti classroom dagiti annak da.
Malaksid iti daytoy, kuna na nga adda pay dagiti nagannak a sumrek iti uneg ti classroom uray manarimaan paylaeng ti panagklase dagiti ubbing.
Nupay kasta, inpakaammo ni Pascua nga adda met ti ipaay da a konsiderasyon kas koma no adda ti agsakit nga ubing wenno adda ti emergency ket palubusan da a sumrek dagiti nagannak.
Innayon na nga uray dagiti agitulnog kadagiti annak da a mangiserrek ti lugan da iti uneg ti pagadalan ket saandan nga ipalubos pay.
Mainaig iti daytoy, inrakurak ni Pascua nga adda ti waiting area a mabalin a pagurayan dagiti nagannak isut gapuna a saanen a kasapulan a sumrek da pay iti uneg ti pagadalan.
