LAOAG CITY – Inlawlawag ni Mr. Daniel Tabili, ti school principal II iti Paoay National High School seknan ti pannakaiwaras ti solicitation letter kadagiti nagannak iti nasao a pagadalan.
Segun ken ni Tabili, ti solicitation letter ket saan a mandatory wenno inkapilitan nga agsungbat dagiti nagannak.
Kuna na a boluntarya ti panangited ti kantidad para iti pagadalan.
Inbatad na a ti nasao nga addang ket napagnunomoan laeng tapno masuposopan ti nakurang a pondo manpod iti MOOE a naiyalokar iti pagadalan bayat ti panagsagsagana ti pagadalan para iti pannakaiysuwta ti face to face classes dagiti agad-adal.
Inlawlawag na a kangrunaan a kasapulan ti pagadalan da ket ti pannakainstolar ti water system iti agpada a campus ti senior ken junior high school pakairamanan dagiti dadduma a gamit a naperdi gapu iti nabayag a saan a pannakausar dagitoy.
Kuna na a karaman ditoy dagiti mausar para iti pannakamentenar dagiti pagalagadan kontra iti covid-19 kas iti magatang nga alcohol ken dadduma pay a kasapulan.
Naamoan a naisend kadagiti amin a teaching personnel ti nasao a solicitation letter ken naipatulod met daytoy kadagiti nagannak.
Maipalagip a basar iti DepEd Division of Ilocos Norte, naiget a maipawil ti panagited ti solicitation letter wenno panagkiddaw iti aniaman a kantidad manipos kadagiti nagannak.
