LAOAG CITY – Inreklamo ni Mr. Joel Remigio, Principal IV ti Plaridel Elem School ditoy ciudad ti Laoag ti maysa a tianggi nga adda iti sango ti nasao a pagadalan.
Daytoy ket kalpasan a naduktalan na nga aglaklako ti tianggi kadagiti ay-ayam a patadem.
Inlawlawag ni Remigio a naduktalan na daytoy kalpasan nga adda ti nakita da iti bag ti maysa nga adalan da no sadinno a nagibaga pay dagiti dadduma adda ti bagi dagiti kaklase da.
Innayon na nga adda payen ti maysa nga ubing a nangiyarmar ti ginatang na nga ay-ayam a patadem kadagiti pada na nga ubbing rason a kinamat da daytoy.
Gapu iti daytoy, inbatad ni Remigio a kinumpiskar da amin dagiti ginatang dagiti agad-adal kalpasan na ket inreport da ti tianggi iti kapitan iti barangay ken iti Business Permit and Licensing Office (BPLO) ditoy ciudad ti Laoag.
Inpakaammo ni Remigio nga inimpormaran da metten dagiti nagannak mainaig iti daytoy a banag no sadinno nga adda dagiti nagannak a nangibaga a saan dan a pabalunan ti kwarta dagiti annak da tapno masigurado a saan da a makagatang iti ay-ayam a patadem.
Mainaig iti daytoy, umap-apela ni Remigio kadagiti tianggi ken dagiti mapmapan aglaklako kadagiti pagadalan a masapol a dagiti laeng nasustansya a makan ti rumbeng nga ilako da kadagiti agad-adal.
Nupay kasta, inbatad ni Miss Antoneth Bareng, ti mangidadaulo iti panagturong ti Business Permit and Licensing Office ditoy ciudad ti Laoag nga iti panagturong da iti ayan ti madakdakamat a tianggi ket nakaserran.
Uray ti panagturong ti news team ti Bombo Radyo ket saan dan a nadanun a silulukat ti nasao a tianggi.
