LAOAG CITY – Naglikudan ni Mr. Joel Remigio, Principal ti Plaridel Elementary School ditoy siudad ti Laoag maipapan iti maipagarup nga innalana ti bayad dagiti ticket iti Raffle Bonanza.
Segun kenkuana, idi koma pay laeng Oktubre 28, 2023 a maiyuswat ti Raffle Bonanza iti nasao a pagadalan ngem naitantan daytoy gapu ta maipagarup a saan met amin a ticket ket nalako dagitoy.
Inbatadna a tunggal nagannak ket adda ti 20 a pedaso a ticket ti ilakoda no sadino agbalor ti 50 a pisos iti maysa a ticket.
Kunana a no bilang mailakoda amin dagiti ticket dagitoy ket adda ti libre a dua a ticket a maited kadakuada.
Mainaig iti daytoy, inpalgakna a saan a natuloy ti panangisayangkatda ti Raffle Bonanza idi Disiembre iti napalabas a tawen gapu ta maipagarup a saan manen a nailako amin dagiti ticket a nangitunda ti naminsan manen a pannakaitantan daytoy.
Nupay kasta, inbagana a naisayangkat ti panag-raffle iti maudi a lawas iti bulan ti Pebrero ita a tawen iti baet nga adda pay dagiti ticket a saan a nailako ken naruayen dagiti agriri iti daytoy.
Inpakaammona nga adda ti napagnunumoan dagiti Parents Teachers Association nga adda ti maiyuswat a Raffle Bonanza iti pagadalanda.
Naammoan a dagiti mapangabakan dagiti maseknan ket adda iti 1st prize a 30 a ribu a pisos, 2nd prize a 10 a ribu a pisos, 3rd prize a 5 a ribu a pisos ken adda pay ti lima a consolation prizes a sag-sangaribu a pisos.
Innayonna a dagiti amin a kuarta a bayad ti nailako a ticket ket iggem iti Presidente ti Parents Teachers Association.
Kabayatanna, inpanamnamana nga adda ti sumaruno nga interbyu kenkuana iti biang ti Bombo Radyo Laoag tapno sungbatan dagiti dadduma pay a saludsod ti News Team kenkuana.
Iti agdama, bayat a maisursurat daytoy a damag ket ikarkarigatan ti News Team ti Bombo Radyo Laoag nga alaen ti takder ni Dr. Joann Corpuz, ti Schools Division Superintendent ditoy siudad ti Laoag pakaseknan iti nasao nga isyu.
