LAOAG CITY – Pito ti naimaldit a baro a kaso ti covid-19 ditoy probinsya rason nga umaboten iti 212 ti pakadagupan ti kaso.
Iti kaudian nga update ti gobierno probinsya, dagiti baro a kaso ket lima dagiti empleado ti Ilocos Norte Police Provincial Jail (INPJ), maysa ti local resident ken maysa ti mangisursuro.
Naamoan a dagiti empleado ti INPJ a nagpositibo ket isuda IN-C206 ket agtawen ti 26 a babai, residente iti Brgy. Virbira iti ili ti Carasi; IN-C207, agtawen ti 47 a lalaki, residente iti Brgy. 2 ditoy siudad, IN-C208, agtawen ti 44 a lalaki, residente iti Brgy. 13 ditoy siudad; IN-C209, agtawen ti 38 a lalaki, residente iti Brgy. 55-B ditoy siudad kenni IN-C210, agtawen ti 44 a lalaki manipod iti Brgy. 15 iti ili ti Bacarra.
Agpapada dagitoy a nakapulapol ni IN-C193 a maysa metlaeng nga empleado ti INPJ.
Kabayatanna, ni IN-C211 ket maysa a babai nga agtawen ti 44, local resident ken agnanaed iti Brgy. 46 ditoy siudad idinto a ni IN-C212 ket agtawen ti 31 a babai, mangisursuro ken residente iti Brgy. 50 ditoy siudad, agpada dagitoy a nakapulapol ni IN-C196, maysa metlaeng a mangisursuro a residente iti Brgy-49 Raraburan ditoy siudad.
Mainaig iti daytoy, ni laeng IN-C206 ti symptomatic rason a naka-admit iti ospital idinto a dagiti nabatbati nga innem ket agpapada nga asymptomatic ken nagtalinaed iti isolation facility.
Iti agdama ket 54 dagiti aktibo a kaso ditoy probinsya idinto a nagtalinaed a dua ti bilang dagiti pimmusay.
