LAOAG CITY – Karaman ti probinsya ti Ilocos Norte kadagiti pilot province a pangisayangkatan ti Australian Center for International Agricultural Research wenno collaboration project a maaw-awagan ti “Developing Soil Knowledge Information and Capacity.”
Segun ken ni Mr. Arnold Pascua ti mangidadaulo ti Provincial Agriculture Office, iti babaen daytoy a programa ket ad-adda pay maammuan no ania ti napintas a maimula iti klase ti daga nga adda ditoy probinsia.
Kunan a maysa kadagiti kalikagomda a palawaen ti produkto na ket ti panagmula ti bawang.
Malaksid ditoy probinsya ket karaman pay ti probinsya ti Tarlac, Bataan, Agusan del Sur, sumagmmaano nga state colleges kas iti University of Southern Mindnao, ken ti Mariano Marcos State University.
Innayonna a tapnu magun-od ti nasao a banag ket masapol nga ikkan ti konseho ti pammalubos ni Gov. Matthew Marcos-Manotoc a sumrek iti collaboration agreement iti Griffith University nga ireprepresentaran ni Professor Chenrong Chen.
Naamoan a 3,500,000 a dolyar ti budget ti lima a tawen a programa, idinto nga iti counterpart ti probinsya a pakairamanan ti financial capacity ti MOOE a nakabase iti annual salary ti project leader ken ti admin cost ket agdagup iti 1,561,247 pesos.
Mainaig iti daytoy, ti nasao a programa ket nabukel iti babaen ti kaunaan a soil summit idi napan a Hunyo 2023 ken ita ket agtultuloy ti monitoring saan laengen a nakapokus iti daga no di ket agraman ti status dagiti mannalon sipud ta admitiren ni Pascua a 90 a porsiento ti nagbabaan dagiti mannalon iti intero a lubong a mangitunda ti pannaka-apektar ti produktibidad iti sektor ti agrikultura.
