LAOAG CITY – Inpasigurado ni Dr. Loida Valenzuela Provincial Veterinarian a natalged ti probinsia nga Ilocos Norte seknan iti African Swine Fever (ASF).
Segun kenkuana, nagpatulongda kadagiti nadumaduma a Munisipio tapno kitaen da dagiti groceries, merkado publiko ken dadduma pay a paggatangan ti karne ti baboy.
Inbatadna nga adda ti isaysayangkatda a panagamiris kadagiti karne ti baboy ditoy probinsia babaen iti panangipatulodda ti sample idiay Manila a no sadinno a nagbalin a negatibo ti resulta iti nasao a sakit.
Inpasingked ni Valenzuela nga awan ti pakadanagan dagiti kaprobinsiaan a gumatang ti karne ti baboy gapu ta naiget ti pannakaamiris na babaen kadagiti Meat Inspectors.
Inpakaammona pay a naiget ti pannkabantay dagiti pagserkan a mabalin a pakaiserrekan dagiti maparti a baboy kas iti ili ti Badoc ken iti ili ti Pagudpud.
Inpagunamgunam ni Valenzuela a mangiparuar ti Ilocos Norte ti bulletin seknan iti ASF.
Ditoy a mailanad dagiti lugar nga apektado iti ASF kas iti Region 3, Davao Occidental, Pangasinan ken dadduma pay a paset ti Luzon.
Inlawlawag ti doktor a dagiti sumaganad a lugar a pakaitungpalan ti temporario a restrictions iti pannakaiserrek ti baboy karaman dagiti naproseso a karne ket karaman ti probinsia ti Rizal, Quezon City, Malabon ken Navotas iti Metro Manila, Probinsia ti Cavite kangrunaanna iti Dasmariñas, Bacoor, General Trias, Imus, Indang ken General Mariano Alvarez, Probinsia ti Bulacan, Probinsia ti Pampanga, Probinsia ti Nueva Ecija ken dadduma pay.
Mainaig iti daytoy, kiniddaw ti Provincial Veterinarian a no adda dagiti matmatay a baboy ket kasapulan a maireport nga insigida iti opisinada tapnon maadal no ania ti rason a nakatayan na.
Kabayatanna, inpanakkel ni Valenzuela a nagtalinaed ti Ilocos Norte nga awan pay ti kaso ti ASF.
