LAOAG CITY – Nakadanunen iti ciudad ti Manila ti producer to consumer program ti gobierno probinsial.
Segun ken Ms. Elma Gabriel, mangidadaulo ti Micro, Small, and Medium Enterprises ditoy probinsya, maikatlo a ciudad ti Manila a nakadanunan ti nasao a programa, immunan iti Quezon City ken San Juan iti Metro Manila.
Inbatad ni Gabriel a daytoy a pannakibinnulig da iti tallo a local government unit iti Metro Manila ket dakkel ti naitulong na kadagiti Micro, Small, and Medium Enterprises ditoy probinsia, kas iti napapintas ken napalawa a negosyo, ken napagtalinaed da dagiti empleado dagitoy.
Innayon na nga adda dagiti gundaway nga agkurkurang payen ti maibibyahe a produkto agsipod ta kaay-ayo dagiti aggatang nangruna kadagiti Ilocano-blooded customer nga agnanaed iti ciudad ti Manila.
Kuna ni Gabriel a ti kangrunaan a magatang no food items, ket ti bagnet, longganisa ken empanada, idinto a no non-food item ket ti abel products.
