LAOAG CITY – Agkurkurang dagiti nagdumaduma a produkto a naaramid manipud iti kawayan a mailaklako kadagiti nagdumaduma a pagtagilakoan saan laeng nga iti pagilian ngem iti ballasiw taaw.
Daytoy ti kangrunaan a nakaallukuyan ti gobierno probinsial a mangipadur-as iti industria ti kawayan ditoy probinsia.
Segun ken ni Mr. Hashler Garalde, Bamboo Focal Person ti Provincial Government of Ilocos Norte, inpasigurado ni Cong. Jose Manuel Alba ti Bukidnon a tumulong iti pannakailako dagiti nagdumaduma a produkto manipud iti kawayan a maaramid ditoy probinsia.
Inbatadna nga inpatalged ti diputado iti gobernador a dakkel ti mapastrek kadagiti produkto a naaramid iti kawayan ken pagaayat a gatgatangen dagiti sabsabali a pagilian.
Kunana nga inkari ni Alba a tumulong a mangilako kadagiti muebles manipud iti kawayan nga aramid dagiti taga siudad ti Batac pakairamanan iti ili ti San Nicolas.
Malaksid iti daytoy, inpakaammo ni Garalde nga adda pay ti plano a pannakaipasdek ti maysa a “showroom” ditoy siudad ti Laoag a pakaipanan dagiti maaramid dagiti kakailian a produkto manipud iti kawayan.
Innayonna a daytoy ti mangipamatmat iti kinaiget ti kalikagum ti gobierno probinsial a mangipadur-as iti industria ti kawayan ditoy probinsia.
