LAOAG CITY – Naisayangkat iti Auditorium ti Kapitolio Probinsial ti programa mainaig iti National Disability Rights Week.
Inlawlawag ni Mrs. Carolyn Domingo, Disability Affairs Officer 1 ti Provincial Social Welfare and Development Office a nagatendar iti nasao nga aktibidad dagiti pannakabagi dagiti dua a siudad ken dagiti duapulo ket maysa nga ili ditoy probinsia.
Inbatadna a malaksid kadagiti pannakabagi dagiti Persons With Disability Affairs Office ket nagatendar pay dagiti pannakabagi dagiti City/Municipal Social Welfare and Development Office pakairamanan dagiti officer ti Provincial Federation ti Association of Persons With Disabilities ken dagiti recipient ti financial assistance nga in school blind learners.
Segun kenkuana, nagbalin a Resource Speaker ni Mr. Austin Jonel Madamba manipud iti Local Government Unit a nangilawlawag iti pakaseknan ti pannakaipatungpal ti programa ti Persons With Disability Affairs Office ken ti trabaho ti Local Social Welfare and Development tapno saan a madoble ti pannakaipatungpal dagiti programa.
Kunana a nangipaay met ti “inspirational message” ni Hon. Portia Pamela Salenda, Chairman ti Committee on Social Welfare and Development and Public Service ti Sangguniang Panlalawigan.
Kabayatanna, inpakaammo ni Domingo a determinado ni Gob. Matthew Marcos Manotoc a mangkitkita iti wagas no kasano nga ad-adda pay a maipaayan ti tulong dagiti adda ti rangkap ti bagina ditoy probinsia.
Innayonna a maysa kadagiti kangrunaan a paset ti selebrasion ket ti pannakaipaay ti cash assistance kadagiti blind learners wenno dagiti agbasbasa a bulsek nga opisial a naiyenrol iti Special Education School.
Innayonna nga innem a bulsek ti inpaayan ti gobierno probinsial ti cash assistance a lima ribu a pisos ti tunggal maysa.
