LAOAG CITY – Dakkel a tulong para kadagiti Indigenous people iti ili a Solsona ti programa nga iyem-emplementar ti National Commission on Indigenous People (NCIP) seknan ti panagpanday ti aliwa.
Daytoy ti kinumpirmaran ni Atty. Jesus Agbayani, mangidadaulo ti NCIP ditoy probinsya.
Kunana nga ado dagiti nalalaing nga agpanday iti nasao nga ili gapo iti idadalan da iti training itay kallabes.
Inbatad ni Agbayani a ti plano da ket agaramid dagiti maseknan nga agpanpanday ti miniture ti aliwa ken maipan iti espesyal a packaging tapno mailako kadagiti turista kangrunaan kadagiti agturturong iti Solsona-Apayao Road.
Segun kenni Agbayani, mai-display pay dagiti aramiden dagiti Indigenous people iti maangay nga IP Summit ita a bulan ti Oktubre.
Malaksid iti daytoy, inpakaammo na nga adda pay ti proyekto ti NCIP a panagmula ti ube idiay ili ti Adams a pinondoan ti gobyerno national nga umabaot ti maysa a milyon a pisos.
