LAOAG CITY – Nagballaag ti maysa a progresibo a grupo kontra iti aniaman a gandat a pannakibiang wenno manipulasyon kadagiti dokumento nga adda ti pakainaigan iti kaso ti pimmusay a dati a Department of Public Works and Highways Undersecretary Catalina Cabral, kalpasan a naiparuk-at ti resulta ti autopsy ti bangkay na.
Nagpanawagan ti Samahan ng Progresibong Kabataan ti dagus ken naiget nga imbestigasyon iti bigla lattan a pannakatay ni Cabral.
Immunan nga inbatad ni Department of the Interior and Local Government Secretary Jonvic Remulla a basar iti autopsya a naisayangkat ken ni Cabral, rimuar a blunt force trauma ti nakatayan na ken awan ti senyales ti “foul play,”.
Inpetteng met ti grupo a ti mapagduduwaan a pannakatay ni Cabral ket agkasapulan ti nangatngato a lebel ti panagimbestigar manipod kadagiti forensic expert nga aggapo iti civil society, pribado a sektor, ken akademya.
Innayon da a babaen laeng iti daytoy a wagas iti pannakaitandudo ti anag ti hustisya ken pagsungsungbatan.
