LAOAG CITY – Natiliw ti maysa a babai kalpasan a nagtakaw ti maysa a pares ti sandal iti dakkel a mall iti ili ti San Nicolas.
Nabigbig ti suspek a ni Beverly Ragaza y Datu, agtawen ti 29, naasawaan, promo girl iti maysa a kompanya a masarakan idiay Dagupan City, taga Barangay Bayubay Norte iti Ilocos Sur ngem agdama nga agnanaed iti Barangay 23, San Matias ditoy ciudad ti Laoag.
Segun ti report iti PNP-San Nicolas, inbatad ni Arnel Alcantara Agbasa, agtawen ti 23, taga Sarrat, Ilocos Norte ken Security guard iti nasao a mall, kabayatan ti idadalan ni Ragaza iti Security guard metal detector ket nag-alarm daytoy.
Gapu iti daytoy, kinita na a dagus ti iggem a paper bag ni Ragaza ket ditoy a nakita da ti maysa a bado nga agbalor ti 200 a pisos nga addaan ti resibo idinto a ti maysa a pares ti sandal nga agbalor ti 899 a pisos ket awan resibo na.
Inpakaammo a dagus ni Agbasa iti Head Security da a ni Alwyn Fiesta Macario, taga Barangay Zambaonga ditoy ciudad ti napasamak ken inpan da a dagus ti suspek iti PNP-San Nicolas.
Iti agdama, nagtalinaed ti suspek iti kustodyar ti PNP iti ili ti San Nicolas.
