LAOAG CITY – Inlawlawag ni Engr. Robert Adaya, Building Official ditoy siudad ti Laoag a proof of ownership ti kangrunaan a rason no apay adda dagiti maipaspasardeng a maar-aramid a pagtaengan ditoy siudad gapu iti kinaawan ti building permit-da.
Segun kenkuana, adda dagiti lote a saan pay a na-subdivide ken saan met nga ipalubos dagiti agkakabagian nga adda ti agpatakder ti balay ti maysa kadakuada.
Inpasingkedna a regular ti panangmonitor ti opisinana kadagiti nagduduma a barangay ngem inadmitirna a saanda a kabaelan amin gapu iti kinalawa ditoy siudad ti Laoag.
Kunana a katinnulunganda dagiti concern citizens a mangipadpadanon kadakuada dagiti indibidual nga agpatpatakder ti pagtaenganda nga awan ti building permit-na.
Maipalagip nga adda ti maysa a residente iti Brgy. Gabu ditoy siudad ti Laoag a maipagarup nga agipatpatakder ti pagtaenganna nga awan ti building permit-na.
