LAOAG CITY – Manamnama a maipasa iti Sang. Panlalawigan ti mailunglungalong a budget ti gobierno probinsial agingga iti panagngudo ti agdama a bulan ti Nobiembre.
Daytoy ket gapu ta patien ni Sang. Panlalawigan Member Donald Nicolas, chairman ti committee on appropriations a kabaelanda nga ileppas ti budget hearing iti uneg ti uppat nga aldaw.
Inlawlawagna nga adda iti napintas a pannakaisagana ti “proposed budget”.
Inbatadna a daytoy ket babaen pay iti naiget a panangkita ni Gob. Matthew Marcos Manotoc iti pannakaisagana ti “budget”.
Segun ken ni Nicolas, mamin-adu a daras a paayaban ti gobernador dagiti “department heads” para iti pannakaarisit a naimbag ti budget.
Innayonna a manamnama a mangrugi a maisayangkat ti budget hearing intono Nobiembre 15 ken agpatingga intono Nobiembre 18.
