LAOAG CITY – Umabot iti P2,711,836,177.81 ti proposed budget ti Office of the Governor.
Daytoy ti inpakaammo ti Sangguniang Panlalawigan kabayatan ti regular session.
Kinunada a karaman daytoy a pondo kadagiti matratar kabayatan ti maiwayat a budget hearing iti daytoy a bulan ti Nobiembre.
Inpetteng ti legislative body a ditoy a matratar ken maamoan no apay nga umabot ti kastoy a gatad ti kidkidawen a pondo ti Office of the Governor ken no ana dagiti proyekto ti pakaipanan na.
Maipalagip nga immununan nga inpetteng ni Sangguniang Panlalawigan Member Donald Nicolas, Chairman ti Committee on Appropriations, a naikeddeng iti uppat nga aldaw ti pannakaisayangkat ti budget deliberations kadagiti nagduduma a pangopisinaan ti gobierno probinsial ita a bulan.
Inbatadna a maiyuswat ti budget hearing inton Nobiembre 19 agingga 22 tapno matratar a naimbag dagiti nailungalong a pundo iti tunggal opisina ken matingiting a nasayaat ti pakaibanagan dagiti programa ken proyekto.
Inlawlawagna nga immununan a naipakaamo kadagiti pagopisinaan a ti maudi a panagipasa ti proposed budget da ket idi Oktubre 17.
Innayonna nga idauloan ti Local Finance Committee ti pannakaisayangkat ti budget hearing a bukbuklen ti Provincial Treasure’s Office, Provincial Planning and Development Office ken Provincial Accounting Office.
Kabayatanna, mangnamnama ti Chairman ti Committee on Appropriations ti hunta probinsial nga agbalin a naannayas ti pannakatingiting ti pundo ti probinsia para iti tawen 2025 kas kadagiti naglabas a tawen.
