LAOAG CITY – Inlawlawag ti House Prosecution panel nga addaan ti pannakabalin ti Senate Impeachment Court a desisionan ti isyu ti 2/3-vote threshold bayat ti manarimaan nga impeachment trial kontra ken ni VP Sara Duterte.
Inpetteng ni Rep. Chel Diokno a saan a two-thirds requirement ti kweskwestionaran ti prosekusion, no diketdi ti denominator no sadinno maibasar daytoy iti two-thirds para iti conviction.
Mainaig iti daytoy, sinublianan ni Diokno ti nagbalin nga opinyon dagiti uppat nga amici curiae a segun kadakuada, ti 16 votes ket saan nga absolute.
Inbatadna a masapol a kitaen ti pakasaritaan ti accountability, gapu ta dagiti senador ti agbalbalin kas senator judges a masapol a mangngegan ken matingitingda nalaing dagiti amin nga ebidensia sakbayda nga agbotos.
Iti baet daytoy, inladawan ni Diokno ti mabalin nga agbalin a problema no maibilang iti denominator dagiti senador a saan a nakapagsapata kas impeachmet judges wenno saan a nakipagpaset iti proceedings.
Kabayatanna, inbatad met ti defense team ni Vice President Sara Duterte a masapol a saan a mailaksid iti threshold dagiti senator-judges nga absent wenno dagiti saanda a kabaelan a makaatendar iti impeachment proceedings.
Iti presentasion ni Atty. Michael Poa, inpettengna nga addaan ti rekord ti korte iti amin a mapaspasamak iti proceedings a masapol laeng a masublianan wenno repasuen ti absent a senator-judge.
Segun kenkuana, no saan a makapag-render ti fair vote dagiti absent a judge, mabalin da met nga ag-abstain.
Inpanagetget ni Poa a saanen a masapol nga ibaba ti voting threshold no diketdi suruten lattan ti dati ken ti nakaisurat iti linteg a 2/3 ti 24 a senador ti pagilian wenno 16 votes para iti conviction.
Kabayatanna, karaman kadagiti saan a maibilang nga agbotos ket dagiti senador a nakabalud, dagiti aglemlemmeng ken dagiti senador a saan a nakaatendar iti impeachment trial gapu iti medical condition-da.
