LAOAG CITY – Inbatad ti House prosecution panel a mabalin nga adda pattern ti panagusar ni Bise Presidente Sara Duterte iti confidential funds idi mayor pay laeng daytoy ti Siudad ti Davao ken idi indauluanna ti Office of the Vice President (OVP).
Segun kenni Lanao del Sur Rep. Zia Alonto Adiong, saan a paset ti impeachment charges ti panagusar ti confidential funds iti siudad ti Davao, ngem mabalin nga agserbi daytoy a konteksto iti agdama a kaso.
Mainaig iti daytoy, no maibasar iti rekord ti Commission on Audit, dimmanon ti confidential funds ti Davao City iti P144 million idi 2016, P293 million idi 2017, P420 million idi 2018, ken P460 million iti kada tawen manipud 2019 agingga 2022.
Kinuna ni House prosecutor Rep. Joel Chua a nakadkadlaw ti panagngato ti confidential funds idi panawen ni Duterte kas mayor ken ti simmaruno a panagkiddaw iti confidential funds manipud iti Office of the Vice President (OVP) ken Department of Education.
Segun iti abogado ti prosecution a ni Benjamin “Jay” Tolosa Jr., mabalin a napateg dagiti napalabas nga aktibidad no makatulongda a mangipakita iti pattern, agraman dagiti posible a panagpapada dagiti indibidual a nairaman ken ti wagas a pannakausar ken pannakaikkat dagiti confidential funds.
Nupay kasta, inlawlawag ti prosekusion a saan a direkta a karaman iti impeachment charges kontra ken ni Duterte ti pannakausar ti confidential funds iti Davao City.
