LAOAG CITY – Inbinglay ti House prosecution panel dagiti responsibilidad ti kada prosecutor para iti umas-asideg nga impeachment trial ni Vice President Sara Duterte.
Segun ken ni lead prosecutor ken House Justice Committee Chairperson Gerville “Jinky Bitrics” Luistro, iggaman ti kada prosecutor ti saan a nababbaba ngem dua nga articles of impeachment tapno al-alisto ti pannakaipresentar dagiti ebidensya ken panagdengngeg dagiti testigo.
Karaman kadagiti alegasyon kontra ken ni Duterte ti maipagarop a saan nga umiso a panagusar ti confidential funds ti Office of the Vice President ken Department of Education, saan a mailawlawag a kinabaknang, panagpasuksuk ken maipagarop a panagipangta na kada Presidente Ferdinand Marcos Jr., First Lady Liza Araneta-Marcos, ken dati nga Speaker Martin Romualdez.
Inpasigurado ti prosecution panel a nakasagana da a mangpaneknek ti uppat nga articles of impeachment usar dagiti ebidensya manipod kadagiti imbestigasyon ti Kongreso, karaman ti Philippine Statistics Authority, National Bureau of Investigation, ken Commission on Audit.
Siyam a prosecutor ti nadutukan iti Article I, a mangak-akusar ken ni Duterte a nanglabsing iti Konstitusyon, graft and corruption, ken pananggulib ti panagtalek ti umili gapu iti maipagarop a saan nga usto a panangusar ti P500 milyon a confidential funds ti opisina ti Bise Presidente ken P112.5 milyon a confidential funds ti Department of Education.
Karaman kadagiti prosecutors iti nasao nga artikulo ket isuda Luistro kas lead, Manila Rep. Joel Chua kas second lead, karaman da Mamamayang Liberal Party-list Rep. Leila de Lima, Akbayan Party-list Rep. Chel Diokno, Bicol Saro Party-list Rep. Terry Ridon, Iloilo Rep. Lorenz Defensor, Bukidnon Rep. Jonathan Keith Flores, 1-Rider Party-list Rep. Rodge Gutierrez, ken Cagayan de Oro Rep. Lordan Suan.
Agpada metlaeng ti bilang dagiti prosecutors a mangiggem iti Artikulo II.
Naipalaon iti nasao nga artikulo ti nalawag a panaglabsing iti konstitusyon ken pananggulib ti panagtalek ti umili gapu iti maipagarop a saan amailawlawag a kinabaknang ni Vice President Duterte, pannakapaay na a nangideklarar kadagiti sanikua iti Statements of Assets, Liabilities and Net Worth (SALN) na ken ti napaay a nangi-divest kadagiti interest iti negosyo kabayatan nga adda iti pwesto.
