LAOAG CITY – Posible a saanen nga iprisintar ti House prosecution panel ti ebidensia para iti bribery charge kontra ken ni Vice President Sara Duterte no agkurang ti oras ti impeachment trial sakbay a rugian ti Senado ti deliberasion iti 2027 national budget.
Segun ken ni prosecution spokesperson Atty. Benjamin Tolosa Jr., target ti prosekusion ti panagleppas ti presentasionda kadagiti ebidensia kontra ken ni Duterte inton katengngaan ti bulan ti Oktubre.
Inbatad ni Tolosa a maysa kadagiti ikonkonsiderar ti prosekusion ket ti nabatbati pay nga oras iti panagusig no maituloy pay ti presentasion ti ebidensia mainaig kadagiti bribery allegation.
Immunan a dinakamat ti prosekusion ti panagsasaritada no ituloyda nga iprisintar ti presentasion ti impeachment article a mangakakusar ken ni Duterte mainaig iti panangbayadna wenno panangipasuksokna ti kwarta kadagiti opisial ti Department of Education tapno saan daytoy a maitudo kadagiti panaglabsingna iti procurement rules idi indauloanna ti nasao nga ahensya.
Malaksid iti bribery, karaman pay iti impeachment case dagiti alegasion ti saan nga umno a panagusarna kadagiti ginasot a million a piso ti confidential funds, unexplained wealth ken ti panangpangtana kada Presidente Ferdinand Marcos Jr., First Lady Liza Araneta-Marcos ken ni dati a House Speaker Martin Romualdez.
Kabayatanna, inpetteng ni Tolosa tingtingitingen ti prosekusion no masapol pay ti panangiprisintarda kadagiti amin a financial records mainaig iti unexplained wealth allegation gapu iti kinaado dagiti dokumento a masapol a mailanad iti impeachment court.
