LAOAG CITY – Naragsakan ti prosekusyon iti nagbalin a desisyon ti Senate Impeachment Court a mangiparuk-at ti subpoena para iti bank records, Anti-Money Laundering Council (AMLC) reports, ken tax documents ni Vice President Sara Duterte ken ti asawa na a ni Manases Carpio.
Basar iti House prosecution panel, ti nasao nga addang ket maysa a dakkel a balligi iti partido da gapu ta mangipaay daytoy ti nalawlawa nga ebidensiya tapno paneknekan ti maipagarop nga “unexplained wealth” ti Bise Presidente.
Binasa ni Senate Presiding Officer Francis “Chiz” Escudero ti ruling iti maikapito nga aldaw ti panangusig, no sadinno nga inpetteng ti korte a naipaay dagiti kidkiddawen a dokumento ti rekisito ti impeachment proceedings: nalawag ti pannakailadawan, alisto nga establisaren ken adda ti prima facie relevance dagiti alegasyon.
Karaman iti subpoena ti records ti 19 corporate entities a konektado iti agasawa, basar iti General Information Sheets, Articles of Partnership, ken dagiti Statement of Assets, Liabilities, and Net Worth (SALN) da manipod 2022 agingga iti 2025.
Kinondenar ti depensa ti subpoena kas “fishing expedition” ken mailabsing iti due process, ngem inpetteng ti korte a saan a mabalin a lapdan ti bank secrecy laws ken confidentiality provisions ti Anti-Money Laundering Act ti bileg ti Senado kas impeachment court.
Iti desisyon, dinakamat pay ti tribunal ti precedent idi ti impeachment trial ni dati a Chief Justice Renato Corona no sadinno a napilit nga inparuk-at ti tax records na.
Para iti prosekusyon, ti pannakaibutaktak dagiti financial records ket mangipaay ti nalawlawag a ladawan iti naggapwan ti kinabaknang ni Duterte ken agserbi kas natibker a pagibasaran iti kaso da.
Ti nasao nga addang ket makitkita a kritikal iti panangdeterminar no adda ti korapsyon ken saan nga umiso a panangusar ti bileg ti bise presidente.
