LAOAG CITY – Inawagan ti House prosecution panel nga “architect” ken “mastermind” ni Vice President Sara Duterte iti panangiggem ken panangusar ti confidential funds ti Office of the Vice President (OVP), kabayatan ti panangkwestyunar ti maipagarop a panagbaliw-baliw ti palawag ti opisina na nga inladawan ti prosekusyon a possible nga “scam.”
Iti panagtultuloy ti panagdengngeg iti Senate Impeachment Court, binukitkitan ni counsel for prosecution Atty. Mae Divinagracia dagiti rason iti panagusar ti confidential funds para kadagiti *surveillance activity* ken ti uppat nga agduduma a bersyon ti OVP mainaig iti pannakagastos ti nasao a pondo.
Gapu iti daytoy, sinaludsud ti prosekusyon no ti agbaliw-baliw rakurak ti nasao nga opisina ket indikasyon ti panagswitik wenno maysa laeng daytoy a panagtakaw wenno “scam.”
Dagus met a kinontra ti defense team ti panagusar kadagiti sarita nga “scam” ken agswitswitik tapno ibilin ti pannakaikkat wenno pannaka-delete dagitoy kadagiti opisyal a rekord ti trial.
Iti sabali a paset ti panagsaludsud, inpresentar ti prosekusyon dagiti dokumento a mangipakpakita a ni Duterte ti maipagarop a mismo a nagkiddaw ti ₱250 milyong confidential funds, nagdessiyon iti kantidad a kiddawen ken nagpirma kadagiti nasao a dokumento para iti pannakaiparuk-at ken *liquidation* ti pondo, banag nga inusar ti prosekusyon tapno iladawan ti bise presidente kas “architect” ken “mastermind” ti sibubukel a operasyon.
Nupay kasta, napaikkat met iti rekord dagiti nasao a sarita kalpasan nga immapela ti depensa.
Tapno maliklikan ti maulit-ulit a panagusar kadagiti saan a maiyannatop a sarita ken ti agtultuloy a panangkontra ti depensa, mismon a ni Presiding Officer ken senador Francis “Chiz” Escudero ti nagsaludsud no ti amin a transaksyon, manipod iti panagkiddaw ti pondo, panaggastos, liquidation, agingga iti panagsungbat kadagiti audit finding ket ammo ken adda iti babaen ti supervision, ken adda ti otoridad ti bise presidente.
Kinumpirmaran met daytoy ti testigo ken kunana a dagiti mismo a pirma ti bise presidente ti nagbalin a pagibasaran iti otorisasyon dagiti nasao a transaksyon.
