LAOAG CITY – Inlawlawag ni Dr. Norman Rabago, ti covid-19 consultant ditoy probinsya ti proseso ti panagbakuna ti covid-19 vaccine ditoy probinsya.
Segun ken ni Rabago, umuna a maileppas ti masterlisting wenno ti pannakaala ti listaan dagiti mabakaunaan.
Kunana a dagiti adda ti listaan laeng ti mapalubusan nga agturong iti vaccination site.
Inbatad na a dita nga adda ti naituding a waiting area nu sadino a maysa laeng a batch ti agtalinaed ditoy tapno masurot ti social distancing.
Kalpasan iti waiting area, mapan iti registration area tapno madouble check ti profile ken health declaration ti indibidual nga agpabakuna.
Sumaruno ditoy ti conunselling area nu sadino a dita a mailawlawag ti importansya ti panagbakuna ken dita metten a mapapirmaan ti final consent.
Mainaig iti daytoy, kuna ni Rabago a sakbay nga agderetso iti vaccination area ti maysa nga indibidual, masapol a dumalan manen iti konsultasyon babaen kadagiti doktor tapno makita nu awan ti aktibo a problema iti salun-at.
Inbaga na a nu awan ti agbalin a problema ket ditan a maitudok ti bakuna kontra iti covid-19.
Kalpasan ti panagbakuna, inlawlawag ni Rabado nga adda iti monitoring area nu sadino nga agtalinaed ditoy ti nabakunaan nga indibidual iti 30 a minutos agingga ti maysa nga oras.
Innayun na a bayat nga adda iti monitoring area ket adda dagiti nakaantabay nga emergency team nga isuda ti agresponde nu bilang adda ti agbalin a problema.
Kamaudian na, inpakaamo ti covid-19 consultant a nu awan ti marikna ti nabakunaan nga indibidual kalpasan ti 30 a minutos agingga iti maysa nga oras ket dita laeng a mapalubusan nga agawid ngem masapol nga ibati ti contact number para iti monitoring.
Immunan a naiyuswat ti vaccine simulation iti ili ti Solsona kas panagsagana iti vaccination program ditoy probinsya.
