LAOAG CITY – Inlawlawag ni Atty. Bernie Constantino, ti dati nga IBP president ditoy probinsya ti pannakaiserbi ti search warrant ken pannakaiyuswat ti operasyon daytoy.
Segun ken ni Constantino, sakbay a maipakat ti operasyon ket masapol nga adda ti iggem a search warrant dagiti otoridad manipod iti huwes ti korte.
Kuna na nga iti operasyon, saan a mabalin nga adda dagiti umuna a mangipaay ti seguridad iti lugar a pakaiyuswatan daytoy.
Inbatad na a mismo a dagiti otoridad a mangiserbi ti search warrant ti agkatok iti subject ket dagitoy ti mangipakaamo ti gagemda nga operasyon.
Mainaig iti daytoy, inpakaammo ni Constantino nga iti search warrant ket masapol a nakailanad ti lokasyon, itsura ken eksakto a paset ti balay a masukimat pakairamanan dagiti banag a masapol a mabirok.
Inlawlawag na nga iti pakaiyuswatan ti operasyon ket masapol nga adda dagiti agnanaed wenno dua a witness nga adda iti legal nga edad nu bilang awan ti mismo a subject.
Kabayatanna, inpakaammo ni Constantino a ti panagaplikar para iti search warrant ket masapol nga adda ti complainant nga isu met ti mangipakaammo kadagiti banag a masukimat ken nasken nga adda ti witness.
Innayun na sakbay pay a maisyu ti search warrant ket naiget dagiti proseso ken nasken nga adda ti affidavit.
Immuna iti daytoy, inbatad ni Constantino a ti search warrant ket mabalin a saan nga aggapo iti korte a masakupan ti lugar a pakaiyuswatan ti operasyon laketdi agpada ti judicial region ken rason iti daytoy.
Inpetteng ni Constantino a saan a legal ti operasyon nu dagiti banag a masapol a masukimat ket nabirokan iti lugar a saan a nailanad iti search warrant
Nu pay kasta, kuna na a nu kellaat a makita dagiti iligal a banag iti sabali a paset ti pagtaengan ken awan ti panagsukimat ket valid daytoy.
Mainaig iti daytoy, inpakaammo na a kalpasan ti operasyon ket maaramid ti panagimbentaryo ken adda ti maibati a kopya ti resibo kadagiti maseknan.
Inbatad na a masapol met a maikumpirmar kadagiti maseknan nga opisina dagiti makumpiskar a kas iti armas ken eksplosibo ken kalpasan na ket agderetso iti inquest proceeding babaen iti piskal.
Kuna na a nu mapaneknekan anga husto dagiti nakumpiksar ken ti naiyuswat nga operasyon ket dagus met a maipila ti kaso.
Ti palawag ni Constantino ket kalpasan nga adda ti maipagarup a pannakaimula kadagiti ebidensya kabayatan ti search warrant operation a naiyuswat iti pagtaengan ni Barangay Chairman Felimon Balguna iti Brgy. Estancia iti ili ti Piddig kasta met ken ni Barangay tanod Remarton Ocampo iti Brgy. 26 ditoy siudad ti Laoag.
