LAOAG CITY – Inpakaammo ni Engr Ma. Teresa Bacnat, Provincial Agriculture Officer nga awanen ti mairekrekordda a maperperdi a mula dagiti mannalon gapu iti kinakurang ti supply ti danom sipud nangrugi ti panawen ti panagtutudo.
Mainaig iti daytoy, namnamaenna a babaen iti pannakapasar ti probinsia ti panagtudtudo iti kallabes ket umdas daytoy tapnu matulongan a dummkel a nasayaat dagiti mula dagiti mannalon ken maaddaan ti naan-anay a suplay ti danom a mausar kadagiti kataltalonan.
Inpettengna a dagiti naapektaran iti El Niño phenomenon iti kallabes ket naipaayan ti tulong manipud iti opisinada babaen iti panangibunong ti irrigation hose, water pumps, ken fuel assistance nga inusarda ti panangkutkot wenno pangrepair iti bukodda a small farm reservoir.
Innayonna nga adda ti ipaay ti Department of Agriculture a rice seeds ken patienna a natulongan a nakarekobre dagiti mannalon iti epekto ti El Niño phenomenon.
Maipalagip nga umabot ti nasurok 66 million pesos (66,356,286) ti balor ti nadadael iti benneg ti agrikultura ditoy probinsia gapu iti El Niño phenomeneon.
Kabayatanna, immunan nga inbatad ni Engr. Bacnat nga agdagup ti 1,506.39 ektaria ti nadadael a mula dagiti taltalonen ti 3,679 nga indibidual.
